Sərnişin avtobusunun sərxoş sürücüsü qəza törətdi.

Bakıda 202 nömrəli marşrut avtobusu qəza törədib. Hadisə Binəqədi rayonu, Əhməd Rəcəbli küçəsində baş verib. "Mercedes" markalı avtomobillə toqquşan "Daewoo" markalı avtobus daha sonra yol ayrıcındakı ağaca dəyib. Qəza vaxtı avtobusda sərnişin olmayıb. Hadisə şahidlərinin dediyinə görə, avtobusun sürücüsü avtomobili idarə edərkən sərxoş olub.

"Mercedes"in sürücüsü Adil Ağamalıyev deyib: "Mən bu tərəfə gəlirdim. O məni gəlib solumdan vurdu, özü də kefli. Burada bir oğlan var idi, dedi ki, gördüm, məni vurur, qaçdım, səni vurdu. Məndən sonra gedib ağaca dəyib. Az qalırdı mağazaya girəm. Sürücü də keflidir. Qaçırdı, gedib tutub gətirmişəm".

Bir az keçir, avtobus sürücüsünü post patrul xidmətinin avtomobilindən çıxarıb aparırlar. Aparanın kimliyi isə bəlli olmur. Qolundan və dizindən zədələnən "Mercedes"in sürücüsü xəstəxanaya aparılıb. Avtobus sürücüsünün isə xəsarət almadığı bildirilir. Qəza barəsində hadisə yerinə gec gələn yol polisi əməkdaşları və Binəqədi Rayon Polis İdarəsinin müstəntiqi məlumat verməyib. Qeyd edək ki, 202 nömrəli marşrut xətti "Çinar Trans" MMC-yə məxsusdur. Hadisəni Binəqədi Rayon Polis İdarəsi araşdırır. (musavat)