- Vəsiqəmdə “PRESS” yazılsa da, əslində özümü jurnalist hesab etmirəm, çünki jurnalistikanı deyil, rejissorluğu bitirmişəm. 11-ci sinifdə qəti qərarımı verdim ki, İncəsənət Universitetinə daxil olacaq və yaradıcılıqla məşğul olacağam, çünki uşaqlığım dövlət televiziyasının dəhlizlərində keçib, uşaqlıq dostlarımla səhnəciklər qurub öz kameramıza çəkib, elə özümüz də gülürdük. Ona görə dedim ki, İNCƏSƏNƏT!

- Sizcə, bizim teleməkanda yaddaqalan aparıcı olmaq üçün nələr lazımdır?

- Yaddaqalan aparıcı olmaq üçün ilk növbədə sən öz tərzini seçməlisən, digər aparıcılardan nə iləsə seçilməlisən, kimisə yamsılasan və ya kiminsə yolunu getsən, o zaman deyəcəklər ki, özünü filankəsə oxşadır. Mən də Azərbaycanda maqazin verilişini aparan ilk kişi aparıcı kimi öz stilistikamı seçdim, əl, qol, göz-qaş jestləri ilə hardasa digərlərindən seçildim.

-Niyə gənclərin çoxu televiziyaya, aparıcılığa can atır?

- Maraqlı sahədir yəqin, ona görə. Amma bir şeyi deyim ki, məsələn, 10 il bundan əvvəl bu sahəyə maraq daha çox idi, nəinki indi. Bilmirəm, yəqin yerli TV-lərə o zaman daha çox baxılırdı... Bircə nə edirlər-etsinlər, yeni bir obraz, yeni aparıcılıq tərzi gətirsinlər efirə, başqa heç nə.

- Biz İlkin Həsənlini maqazin proqramlarından, əyləncəli proqramlardan daha çox tanıyırıq. Nə vaxtsa efirdə tam ciddi bir layihə ilə görünə bilərsiniz?

- İlkin Həsəninin 13 illik efir karyerasında vuruşduğu, çarpışdığı bir şey varsa, o da onun soyadının düzgün yazılışı və deyilişidir, amma çox təəssüf, bir nəticə əldə edə bilmirəm - əksəriyyət mənim soyadımı “Həsənli” bilir, amma mən “Həsəni”yəm və dədə-baba soyadım da “Həsəni” olub. Bu soyad Güney Azərbaycan soyadıdır.
O ki qaldı, ciddi verlişə, inanmıram, amma elə karyeramın özü ciddiyətdən başlamışdı: 2001-2002 illərdə 106 Fm-də xəbər diktoru olmuşam.

- Siz efirin ən uğurlu aparıcılar sıyahısındasınız. Bu uğurun səbəbi nədir?

- Bu uğurun səbəbi dəyişilməmək, efir naminə, şan-şöhrət xatirinə simanı itirməmək, səni sevənlərə, hörmət edənlərə 5 qat artığını qaytarmaq. Bax, mənim uğurumun səbəbi budur.

- “ATV maqazin” proqramını niyə yarım qoydunuz? Aparıcılığı nəzərdə tuturam.

- ATV Maqazin mənim üçün doğma və əziz olan bir veriliş idi, çünki o verilişlə tanındım, az da olsa sevildim, amma 2011-də işlərim o qədər çoxaldı ki, gücüm çatmadı, sözün düzü. Eyni anda “ATV maqazin”, “Autotime”, “ATV səhər”, “Xalq ulduzu” və “Bozbaş pictures” - təsəvvür edin, bu qədər iş bir arada idi, həm də artıq getmək vaxt idi, 2002-2011 bəsim idi.

- Özünüzü şou-biznes mühitinə aid edirsinizmi?

- Qətiyyən! Hətta mənə aid olan xəbərlər yerli saytlarda şou-biznes bölümündə dərc olunmasını belə istəmirəm, amma nə edək ki, belə alınır.

- Son vaxtlar sizi hər kəs maraqlı bir obrazda - “Şəmi” obrazında görür. Bu obraz kimin ideyasi idi?

- Bu obrazı sırf təsadüf nəticəsində yaratdım, mən və Ramil Babayev 2004-də ATV-nin ad günü şənliyi üçün düşündüyümüz obrazlar idi, mən Şəmi, o da Şöşü - səhnəciklər hazırladıq, hər kəs maraqla qarşıladı, güldü və belə bir qərara gəldik ki, bu səhnəcikləri ekranlaşdıraq.

- Öncədən bu obrazların belə seviləcəyinə inanırdınızmı?

- Sözün düzü, yox, obrazlarımızın belə seviləcəyini bilmirdik, hər kəs, hətta dost-tanışlar belə deyirdi ki, lazım deyil, bu işi etməyin, heç bir xeyiri yoxdur sizə, həqiqətən elə idi, illər əvvəl səhnəciklərin hazırlanması üçün hətta öz cibimizdən müəyyən vəsait ödəmişik, minimum şəraitdə maksimum iş görmüşük! Amma əsas dəstək bizə 2013-ün yayında ATV müdriyyətindən gəldi, çəkiliş keyfiyyətini daha da artırılması üçün hər cür köməklik etdilər və bu gün “Bozbaş Pictures” ən sevilən layihələrdən biridir.

- Sizcə, “Şəmi” – “Şöşü” obrazı 5 il sonra da sevilən olacaqmı?

- Hər dövrün öz tələbi var, yəqin ki, sevilər, amma 5 il sonra 35 yaşlı İlkin Həsəni və 40 yaşlı Ramil Babayev bu obrazı oyanayacaqlarmı sualı da ortaya çıxır, görək də, başımıza nə gəlir.

- Son illərdə görməyə alışdığımız Rəfael-Coşqun, Elməddin Cəfərov, Fərda Xudaverdiyev və bu kimi bir sıra aktyorlar var ki, artıq özlərinə kifayət qədər tamaşaçı kütləsi toplaya biliblər. Bəs sizin onlardan fərqiniz nədir?

- Adları çəkilən hər kəs bizim dostlarımızdır, qardaşlarımızdır, biz də kiçik zaman ərzində özümüzə tamaşaçı kütləsi toplaya bilmişik, az və ya çox, toplamışıq, ən maraqlısı isə odur ki, bizə 7 yaşlı məktəbli də baxır, 77 yaşlı təqaüdçü də.

- Bir az da keçək şəxsi həyata. Bu il ailə qurmağı düşünürsünüzmü?

- İnşallah, Allah deyən olsun, bəli, evlənməyi düşünürəm.

- Küçədə və ya ictimai yerlərdə sizə Şəmi deyərək müraciət edənlər var?

- Bəli var, amma səmimi deyim ki, xoşuma gəlmir bu hal.

- Şəmi daha ağıllıdır, yoxsa Şöşü?

- Obrazlarımız belədir ki, hər şeyin başında Şəmidir, Şöşü isə onun sağ əlidir, dəliqanlıdır, tez coşandır, amma Şəminin bir kəlməsi ona bəs edər. Suala isə başqa cür cavab verə bilmirəm, qorxuram Şöşü inciyər.

- Ailədə necə birisiniz? Ümumiyyətlə, sizə görə ideal ailə necə olmalıdır?

- Ailənin ilkiyəm, sevimlisiyəm, ailəmlə nəfəs alan birisiyəm və hiss edirəm ki, yaşa dolduqca bu sevgi ilbəil daha da güclənir. İdeal ailəni isə bax belə görürəm, valideyinlərin, sevdiyin insan, sevdiyin insanın sənə bəxş etdiyi varlıq və canının sağlığı! Vəssalam!

- Şəmi ilə Şöşünün yaxın günlərdə daha haralara səyahəti gözlənilir?

- Yaxın günlərdə isə Dağıstan, İstanbul və digər çəkilişlərimiz olacaq. Şəmisevərlərə isə demək istəyirəm ki, gözdə-qulaqda olun, yeniliklər olacaq, özü də yaxşı yeniliklər.

Səbinə Məmmədova
AzVision.az üçün