AzVision.az xəbər verir ki, ABŞ-nin Ticarət Nümayəndəliyinin bəyanatına görə, saziş tərəflər arasında iqtisadi və ticarət əlaqələrini gücləndirəcək və qarşılıqlı fayda təmin edəcək.

“Sənəd tariflərin azaldılması, qeyri-tarif maneələrinin aradan qaldırılması, investisiyaların qoyulması və əsas məhsulların satınalmalarının genişləndirilməsi yolu ilə ABŞ-nin istehsal sektorunun artımını dəstəkləməyə yönəlib”, - məlumatda deyilir.

Tayvan ABŞ-nin sənaye və kənd təsərrüfatı məhsullarının idxalına qoyulan tarif maneələrini 99% aradan qaldıracaq və ya azaldacaq. Avtomobillər və avtomobil hissələri, kimyəvi maddələr, dəniz məhsulları, maşınlar, tibbi ləvazimatlar, elektrik məhsulları, metallar və minerallar daxil olmaqla, Amerika sənaye məhsullarına güzəştli bazar çıxışı təmin olunacaq.

- Bağçılıq məhsulları, buğda, mal əti və mal əti məhsulları, süd məhsulları, donuz əti və donuz əti məhsulları, quzu və qoyun əti, qoz-fındıq, it və pişik yemi, ketçup və fıstıq da daxil olmaqla, Amerikanın kənd təsərrüfatı ixracına da güzəştli giriş təmin ediləcək”, - xəbərdə bildirilir.

Tayvan həmçinin ABŞ-nin avtomobil, tibbi cihazlar, əczaçılıq məhsulları, mal əti, donuz əti, quş əti və emal olunmuş kartof ixracına təsir edən qeyri-tarif maneələrini aradan qaldıracaq.

Bundan əlavə, sazişə əqli mülkiyyətin qorunması, təkmilləşdirilmiş əmək hüquqları və daha güclü ekoloji standartlarla bağlı müddəalar daxildir. Tərəflər təchizat zəncirlərinin davamlılığını artırmaq üçün əməkdaşlığı gücləndirmək niyyətindədirlər.

Sahil İsgəndərov
AzVision.az