DGK-dan AzVision.az-a verilən məlumata görə, A. Əliyev Azərbaycan gömrük xidməti ilə ÜGT və BMT-nin Narkotiklər və Cinayətkarlıq üzrə İdarəsi arasında mövcud əlaqələrdən söhbət açıb, bu əlaqələrin bundan sonra daha da genişlənəcəyinə əminliyini ifadə edib. 2011-ci ildə Bakıda BMT-nin dəstəyi ilə Narkotik Vasitələrin Qanunsuz Dövriyyəsinə Qarşı Mübarizə üzrə Beynəlxalq Konfransa Azərbaycanın ev sahibliyi etdiyini məmnunluqla xatırladan komitə sədri bu mötəbər tədbirin əhəmiyyətindən danışıb, ümumiyyətlə, narkotik vasitələrin qanunsuz dövriyyəsinə qarşı mübarizə istiqamətində Azərbaycan gömrük xidmətinin son illər həyata keçirdiyi məqsədyönlü tədbirlərdən ətraflı bəhs edib.

Azərbaycan gömrük xidmətinin ÜGT ilə fəal əməkdaşlıq etdiyini bildirən DGK sədri A. Əliyev Azərbaycanda ÜGT-nin üç regional strukturu - Tədris Mərkəzi, Potensialın Gücləndirilməsi üzrə Avropa Ofisi və Kinoloji Mərkəzin yerləşdiyini, bu mərkəzlərdə bir sıra ölkələrdən ekspertlərin iştirakı ilə önəmli treninqlərin, seminarların keçirildiyini, gələcəkdə də bu tədbirlərin davam etdirilməsinin vacib olduğunu söyləyib. ÜGT-nin Baş katibi Kunio Mikuriyanın Azərbaycana səfərlərini, dəfələrlə prezident İlham Əliyevlə keçirdiyi görüşləri məmnunluqla qeyd edən A. Əliyev ÜGT ilə Azərbaycan gömrük xidməti arasında əlaqələrin gələcək perspektivlərindən danışıb.

Azərbaycan prezidenti İlham Əliyevin rəhbərliyi ilə ölkədə qeyri-neft sektorunun inkişafı, biznes mühiti və sahibkarlıq fəaliyyətinin yaxşılaşdırılması, beynəlxalq ticarətin asanlaşdırılması və sürətləndirilməsi, tranzit potensialının gücləndirilməsi, turizmin inkişafı istiqamətində həyata keçirilən tədbirlərdən bəhs edən DGK sədri sözügedən sahələrdə mühüm nailiyyətlərin əldə olunduğunu diqqətə çatdırıb. Qeyd edilib ki, Azərbaycanda bütün sahələrdə olduğu kimi, gömrük işinin təşkili istiqamətində də ciddi uğurlar əldə olunub: “Son illər həyata keçirilən mütərəqqi islahatlar, müasir tətbiqlər hesabına gömrük orqanları dinamik şəkildə inkişaf edərək nəinki ölkənin iqtisadi təhlükəsizliyinin təmin edilməsi, eyni zamanda, beynəlxalq ticarətin təhlükəsiz və sürətli şəkildə həyata keçirilməsində mühüm rol oynayan quruma çevrilib”.

"Konteyner daşımalarına nəzarət üzrə Qlobal Proqram"ın icrası çərçivəsində həyata keçirilən tədbirlərdən də söhbət açan komitə sədri bu istiqamətdə işlərin ürəkaçan olmadığını, konteyner daşımalarına nəzarətin səmərəliliyinin artırılması və bu sistemin tətbiqi üçün işçi qrupunun yaradılacağını bildirib və gələcəkdə qarşılıqlı əməkdaşlığın daha da gücləndirilməsini özündə ehtiva edən memorandumun imzalanmasının önəmini qeyd edib.

"Konteyner daşımalarına nəzarət üzrə Qlobal Proqram"ın ÜGT-dən olan baş koordinatoru Norbert Steyln Bakı şəhərindəki Potensialın Gücləndirilməsi üzrə Avropa Regional Ofisində BMT-nin Narkotiklər və Cinayətkarlıq üzrə İdarəsi və ÜGT-nin "Konteyner daşımalarına nəzarət üzrə Qlobal Proqram"ının koordinatorlarının illik iclasının keçirilməsində dəstəyinə görə DGK-ya minnətdarlığını bildirib. N. Steyln "Konteyner daşımalarına nəzarət üzrə Qlobal Proqram"ın icrası prosesində Azərbaycan gömrüyünə bundan sonra da tam dəstək göstərəcəklərini bildirib, eyni zamanda, Əfqanıstan və Pakistan gömrükçüləri üçün ÜGT-nin Bakı şəhərindəki Potensialın Gücləndirilməsi üzrə Avropa Regional Ofisində sərhədlərin təhlükəsizliyi ilə bağlı təlimlərin keçirilməsinə şərait yaradılmasını xahiş edib.

A. Əliyev Əfqanıstan və digər ölkələrin gömrük xidmətləri əməkdaşları üçün ÜGT-nin Bakı şəhərindəki Potensialın Gücləndirilməsi üzrə Avropa Regional Ofisində bir neçə dəfə təlimlərin təşkil olunduğunu və bundan sonra da bu istiqamətdə lazımi dəstəyin göstəriləcəyini diqqətə çatdırıb. Görüş başa çatdıqdan sonra qonaqlar DGK-da gömrük xidmətinin müasirləşdirilməsi ilə bağlı layihələr və "Hədəf" Mərkəzi ilə tanış olublar.

AzVision.az