Bu səbəbdən də “Neftçi”nin oyunçusu ilə əlaqə saxlamağı və onunla həm milli komandamız, həm də “Neftçi” barədə danışmağı lazım bildik.

- Filippinlə oyun həm millidə debüt etməyiniz baxımından, həm də hesabı açmanız baxımından əlamətdar oldu. Oyun haqqında düşüncələrinizi bilmək istərdik.

- Yoldaşlıq görüşü olsa da, qələbə qazanmaq xoşdur. Qarşılaşmada fərqlənməyim və bu qolun milli komandamıza qələbə gətirməsi də ikiqat sevinc yaradır.

- Artıq milli komandamızın üzvü sayıldığınızdan AVRO-2016-nın seçmə mərhələsində qərarlaşdığımız qrup haqqında fikir bildirməyiniz də yerinə düşər

- Asan qrupa düşdüyümüzü demək olmaz. Amma bununla belə, indidən təslim olmaq fikirində deyilik. Sona qədər mübarizə aparmaqla maksimum xal yığmağa çalışacağıq.

- Hələ ötən seçmə mərhələnin sonlarında milli komandamızın çalışdırıcısı Berti Foqts yığmamızın AVRO-2016-nın seçmə mərhələsində üçüncü yer uğrunda mübarizə aparacağımızı açıqlamışdı. Əsas yığmamızın qrupda üçüncü olmaq şansını necə qiymətləndirirsiniz?

- Dediyim kimi, asan qrupda mübarizə aparacağımızı deyə bilmərəm. Amma istənilən halda hər şey özümüzdən asılıdır. Məncə, milli komandamızın son oyunları sözügedən hədəf üçün bizə ümid verir.

- Milli komanda mövzusuna toxunmuşkən Olimpiya millimizin çıxışı barədə danışmamaq olmaz. U-21-in AVRO-2015-dəki qarşıdan gələn oyunlarından nə gözləyirsiniz? Sizcə, komanda qrupu neçəni sırada bitirə bilər?

- Məncə, U-21-in qarşıdakı oyunlardakı çıxışı barədə indidən nəysə demək, Komandanın nəticələrini indidən proqnozlaşdırmaq asan məsələ deyil. Amma Olimpiya millimizin inamlı təsir bağışlayacağına inanıram.

- Gənclərdən ibarət yığma ilə yanaşı, əsas millidə də oynamaq şansı qazandınız. Hansı kollektivdə mübarizə aparmaq daha çətindir?

- Ümumi götürəndə hər iki yığmada oynamaq çətindir. Hansı milli komandaolmasından asılı olmayaraq orda oynamağın məsuliyyəti böyükdür. Gərək istənilən halda tam gücünlə oynayasan.

- Bir az da “Neftçi”dən danışaq. Premier-liqanın son turunda qalib gələn, ölkə kubokunda isə “İnter”lə dünənki səfər oyunundan sərfəli nəticə ilə ayrılan komandanın uğursuzluq zolaqdan çıxdığın demək olarmı?

- Məncə, komandanın bu qələbəyə ehtiyacı var idi. Komandadaxili atmosferin qaydasına düşməsi üçün Qəbələ səfərindən üç xalla dönməyin əhəmiyyəti böyükdür. Ölkə kubokunun 1/4 final mərhələsində “İnter”lə matça gəlincə, ümumilikdə səfərdə qeydə alınan 1:1-lik bərabərlik pis nəticə olmasa da, qələbə hesabını qoruya bilmədiyimiz üçün məyusam. Əgər oyunun gedişində penaltini qola çevirsəydik hesab başqa cür olardı.

- “Qəbələ” ilə oyuna qədərki son 5 oyunda qalib gəlməyən komandanın əsas problemi nə idi?

- Bunu konkret bir şeylə əlaqələndirmək çətin olsa da, cəzalı oyunçularımızın çox olması komandanın oyununa təsirsiz ötüşmürdü. Son qarşılaşmada tam heyətlə oynayaraq qalib gəlməyimiz də hər şeyi ortaya qoyur.

- Son çempionat oyununda qalib gəlsəniz də, hazırda “Neftçi” dördüncü sıradadır və lider “Qarabağ”ın 10 xal gerisindəsiniz. Çempionluğun əldən getdiyini demək olarmı?

- Düşünürəm ki, hələlik hansı komandanın çempion olacağı haqqında birmənalı danışmaq tezdir. Amma “Qarabağ”ın qızıl medallara ən real namizəd olması da danılmazdır.

- Böyükağa Hacıyevin dönüşü sevinclə qarşılanmışdı. Hətta Nazim Süleymanovun dövründə komanda üzvlərinin bilərəkdən qeyri-sabit çıxış etməsi, intizamsızlıq nümayiş etdirməsi haqqında xəbərlər dolaşdırdı. Bu haqda nə deyərdiniz?

- Bu, sadəcə söz-söhbət idi. “Neftçi”nin daxilində heç vaxt belə bir şey olmayıb. Kiminsə bilərəkdən zəif təsir bağışlaması haqqında deyilənlərin heç bir əsası yoxdur.

Mahir Şükürov "AZAL-la oyundan sonra futbolçular Nazim Süleymanovu döymək istəyirdi" açıqlamasını verməklə diqqət çəkmişdi. Bu haqda nə deyərdiniz?

- Man, ümumiyyətlə, belə şeylər haqqında danışmıram. Bu üzdən məsələyə münasibət bildirmək istəmirəm.

Tural Məmmədov
AzVision.az üçün