Bu barədə AzVision.az -a Ombudsmanın mətbuat xidmətindən məlumat verilib. Bildirilib ki, Milli Preventiv Mexanizm fəaliyyəti sahəsində formalaşmış ölkə təcrübələrinin mübadiləsi, bu istiqamətdə əməkdaşlığın daha da inkişaf etdirilməsi məqsədilə TİHEK-in sədri Muharrem Kılıçın dəvəti əsasında ombudsman Səbinə Əliyevanın rəhbərlik etdiyi nümayəndə heyəti Türkiyə Respublikasının Qaziantep şəhərində təcrübə mübadiləsində olub.

Səfər müddətində Qaziantep Şehitkamil açıq tipli cəzaçəkmə müəssisəsinə və Qaziantep Şehitkamil Ərazi Polis İdarəsinin müvəqqəti saxlanma yerlərinə başçəkmələr təşkil olunub. Nümayəndə heyəti müəssisələrdəki qanunvericilik əsaslı yeniliklərlə, saxlanılan şəxslər üçün yaradılan imkanlarla, ümumi şəraitlə, eləcə də həmin şəxslərin hüquqlarının təmini vəziyyəti, burada formalaşmış təcrübə ilə yaxından tanış olub.

Türkiyə İnsan Hüquqları və Bərabərlik Qurumunun yeni açılmış Qaziantep bürosu da ziyarət olunub. TİHEK-in ilk bürosu barədə ətraflı təqdimatlar verilib. Azərbaycan Ombudsmanın regional mərkəzlərinin illərdir formalaşmış təcrübəsi barədə Səbinə Əliyevanın təqdimatı maraqla qarşılanıb. Hər iki qurumun fəaliyyət istiqamətləri barədə fikir və təcrübə mübadiləsi aparılıb, qarşılıqlı şəkildə suallar cavablandırılıb.

Səfər çərçivəsində, həmçinin Qaziantep Böyükşəhər bələdiyyə sədri Fatma Şahin, Şahinbey rayon bələdiyyə sədri Mehmet Tahmazoğlu, şəhər valisi Kemal Çeber, Qaziantep Baş prokuroru İsmail Karataş ilə də görüşlər keçirilib.

AzVision.az