Kürdəmirdə məktəblilər qızılcadan müalicə alır - YENİLƏNİB

 Kürdəmirdə məktəblilər qızılcadan müalicə alır -  YENİLƏNİB
  27 Noyabr 2023    Oxunub:1568
Kürdəmir rayon 2 saylı tam orta məktəbin 6 nəfər şagirdi, Kürdəmir rayon Pirili kənd orta məktəbinin 1 nəfər şagirdi, Göyçay rayon Alpoud kənd orta məktəbinin 2 nəfər şagirdi olmaqla müxtəlif tarixlərdə Kürdəmir Rayon Mərkəzi Xəstəxanasına müraciət ediblər.
TƏBİB-dən AzVision.az-a verilən məlumata görə, onlardan 5-i qızı, 4-ü oğlan olub. Pasiyentlərə hazırda zəruri tibbi xidmət göstərilir, stasionar şəraitdə müalicələri davam etdirilir. Vəziyyəti stabil olaraq qiymətləndirilir.

***
Mərkəzi Aran Regional Təhsil İdarəsi Kürdəmir rayon ümumi təhsil müəssisələrində təhsil alan şagirdlər arasında qızılca xəstəliyinin yayılmasına aydınlıq gətirib.

İdarədən AzVision.az -ın sorğusuna cavab olaraq bildirilib ki, qızılca xəstəliyi ilə bağlı yoluxma halı Kürdəmir rayonunun 1 nömrəli, Atakişili, Sor-Sor, Pirili, Ərəbqubalı, Şilyan və Qarasaqqal kənd tam orta məktəblərinin şagirdləri arasında aşkarlanıb:

"Sözügedən məsələ ilə bağlı Kürdəmir rayon Mərkəzi Xəstəxanasından aldığımız məlumata əsasən, 9 nəfər şagird hazırda xəstəxanada stasionar şəraitdə müalicə alır, digər yoluxan şagirdlərin isə ambulator (ev şəraitində) müalicələri davam etdirilir və şagirdlərin vəziyyətinin stabil olduğu qiymətləndirilir.

Həmçinin təhsil müəssisələri arasında kəskin yoxulma halı baş verdiyi təqdirdə müvafiq səhiyyə qurumu (Gigiyena və Epidemiologiya Mərkəzi) və aidiyyəti yerli təhsili idarəetmə orqanı (Mərkəzi Aran RTİ) tərəfindən müvafiq addımlar atılacaq. Hazırda kəskin yoluxma faktı olmadığı üçün həmin ümumi təhsil müəssisələrinin bağlanılması ilə bağlı qərar qəbul edilməyib.

Mərkəzi Aran Regional Təhsil İdarəsi tərəfindən hazırda aidiyyəti olaraq ümumi təhsil müəssisələrinə sözügedən məsələ ilə bağlı müvafiq tapşırıqlar verilib, xəstəliyin simptomları aşkar olunan şagirdlərin dərhal Kürdəmir rayon Mərkəzi Xəstəxanasına müraciət etməsi və eyni zamanda “Qızılca” virusu xəstəliyi əleyhinə peyvənd olunmaları tövsiyə olunub".

Aytən Zəhra
AzVision.az



Teqlər:





Xəbər lenti